कॉलेज कट्टा न्यूज-
चंद्रपूर प्रतिनिधी :(मनोज मोडक)आंबेडकरी विचारधारा आणि संविधानिक मूल्यांवर आधारित राजकारण करणाऱ्या Azad Samaj Partyच्या चंद्रपूर जिल्हाध्यक्षपदी निलेश ठाकरे यांची नियुक्ती करण्यात आली आहे. त्यांच्या नियुक्तीचा तसेच पक्षप्रवेशाचा कार्यक्रम चंद्रपूर येथील शासकीय विश्रामगृहात उत्साहात पार पडला. या कार्यक्रमाला पक्षाचे राज्य व विदर्भातील पदाधिकारी, विविध सामाजिक संघटनांचे प्रतिनिधी आणि कार्यकर्ते मोठ्या संख्येने उपस्थित होते.
देशभरात आझाद समाज पार्टीचे एकमेव खासदार म्हणून ओळखले जाणारे Chandrashekhar Azad (चंद्रशेखर रावण) यांनी संसदेमध्ये आंबेडकरी समाज, बौद्ध समाज आणि संविधान रक्षणाशी संबंधित अनेक महत्त्वाचे मुद्दे प्रभावीपणे मांडले आहेत. लोकसभेत त्यांनी वंचित, शोषित आणि मागासवर्गीय समाजाच्या प्रश्नांना सातत्याने वाचा फोडत सामाजिक न्यायाचा मुद्दा ठामपणे मांडला आहे. त्यामुळे त्यांच्या कार्यशैलीकडे देशभरातील आंबेडकरी विचारधारेच्या कार्यकर्त्यांचे विशेष लक्ष लागले आहे.
चिमूर तालुक्यातील ताडोबा परिसरात असलेल्या संगरामगिरी येथे भंते ज्ञानज्योती आणि भिक्खू संघ वास्तव्यास असलेल्या ठिकाणी खासदार चंद्रशेखर आझाद यांनी प्रत्यक्ष भेट देऊन परिस्थितीची पाहणी केली होती. त्या ठिकाणच्या समस्या व अडचणी त्यांनी संसदेत मांडून प्रशासनाचे लक्ष वेधण्याचा प्रयत्न केला होता. याशिवाय बौद्ध धर्मीयांशी संबंधित बुद्धगया प्रश्न, संविधान संरक्षण आणि सामाजिक न्यायाशी निगडीत अनेक मुद्दे त्यांनी लोकसभेत उपस्थित करून व्यापक चर्चा घडवून आणली. त्यांच्या प्रभावी मांडणीमुळे ते संसदेत विशेष आकर्षणाचे केंद्र ठरले आहेत.
खासदार चंद्रशेखर आझाद यांच्या या कामगिरीने प्रभावित होऊन पुरोगामी पत्रकार संघाचे राष्ट्रीय संघटक निलेश ठाकरे यांनी आझाद समाज पार्टीत अधिकृत प्रवेश घेतला. सामाजिक व पत्रकारितेच्या क्षेत्रात सक्रिय असलेल्या ठाकरे यांनी समाजातील वंचित घटकांच्या प्रश्नांसाठी सातत्याने आवाज उठविला आहे. त्यांच्या कार्याची दखल घेत पक्ष नेतृत्वाने त्यांच्यावर विश्वास दाखवत चंद्रपूर जिल्हाध्यक्ष पदाची महत्त्वाची जबाबदारी सोपवली आहे.
चंद्रपूर येथील विश्रामगृहात आयोजित पक्षप्रवेश कार्यक्रमात नव्या पदाधिकाऱ्यांचे पुष्पगुच्छ देऊन स्वागत करण्यात आले. या कार्यक्रमाला Bhim Armyचे कार्यकर्ते, सामाजिक कार्यकर्ते तसेच आझाद समाज पार्टीचे विविध पदाधिकारी उपस्थित होते. यावेळी भीम आर्मीचे सुरेंद्र रायपुरे यांनीही उपस्थित राहून निलेश ठाकरे यांना शुभेच्छा दिल्या.
नवीन जबाबदारी स्वीकारताना निलेश ठाकरे यांनी चंद्रपूर जिल्ह्यात आंबेडकरी विचारधारा बळकट करण्यासाठी आणि वंचित समाजाच्या हक्कांसाठी सातत्याने लढा देण्याचा निर्धार व्यक्त केला. तसेच पक्ष संघटन मजबूत करून युवकांना सामाजिक व राजकीय चळवळीत सहभागी करून घेण्यावर भर दिला जाईल, असेही त्यांनी सांगितले.
कार्यक्रमाच्या शेवटी उपस्थित मान्यवरांनी निलेश ठाकरे यांचे अभिनंदन करत त्यांच्या पुढील कार्यासाठी शुभेच्छा दिल्या. चंद्रपूर जिल्ह्यात आझाद समाज पार्टीची संघटनात्मक ताकद वाढवण्यासाठी ही नियुक्ती महत्त्वाची ठरेल, असा विश्वास यावेळी व्यक्त करण्यात आला.
